မြန်မာ့ပင်လယ်ပြင် သီးသန့်စီးပွားရေးဇုန်တွင် သုတေသနပြုပြီးလျှင် နိုင်ငံခြားငါးဖမ်းရေယာဉ်များ ခွင့်ပြုမည်ဟုဆို

Page View : 1,390
News Type : Business

သန်းဌေး

ရန်ကုန်၊ ဒီဇင်ဘာ-၇

အတွဲ (၁၂)၊ အမှတ်(၄၀)

မြန်မာ့ပင်လယ်ပြင် သီးသန့်စီးပွားရေးဇုန်တွင် ငါးသယံဇာတသုတေသနပြုလုပ်ပြီးပါက နိုင်ငံခြားငါးဖမ်းရေယာဉ်များကို ငါးဖမ်းခွင့်ပြုမည်ဖြစ်ကြောင်း မွေးရေ/ကျေးလက်ဝန်ကြီးဌာန ၀က်ဘ်ဆိုက်တွင် ဖော်ပြထားသည်။

ငါးလုပ်ငန်းဆိုင်ရာ ရှေ့လုပ်ငန်းစဉ်မူဝါဒချမှတ်နိုင်ရန် တရားမ၀င်ငါးဖမ်းဆီးမှုပပျောက်ရေးအတွက် နော်ဝေးသုတေသနရေယာဉ်မှ ရရှိလာသည့် အချက်အလက်များအပေါ် အခြေခံတွက်ချက်ကာ နိုင်ငံတကာနိုင်ငံခြားငါးဖမ်းရေယာဉ်များကို ခွင့်ပြုသတ်မှတ်ပေးမည်ဖြစ်ကြောင်း မွေးမြူရေး၊ ရေလုပ်ငန်းနှင့် ကျေးလက်ဒေသဖွံ့ဖြိုးရေးဝန်ကြီးဌာန ဒုတိယ၀န်ကြီးဦးခင်မောင်အေးက ဒီဇင်ဘာ ၂ ရက်၌ ယင်းသင်္ဘောပေါ်တွင်ပြောသည်။

နိုင်ငံတော်သမ္မတ၏ ပြည်ပခရီးစဉ်တွင် နော်ဝေးနိုင်ငံအစိုးရမှ မြန်မာနိုင်ငံအစိုးရသို့ နှစ်နိုင်ငံချစ်ကြည်ရေးအနေဖြင့် တိုင်းတာဆောင်ရွက်ပေးခြင်း ဖြစ်သည့်အတွက် မြန်မာအစိုးရနှင့် ပြည်သူများကိုယ်စား အထူးကျေးဇူးတင်ရှိပါကြောင်း၊ မြန်မာနိုင်ငံ၏ပိုင်နက် ပင်လယ်ကမ်းလွန်ရေတိမ်ပိုင်းနှင့် သီးသန့်စီးပွားရေးဇုန်တို့တွင် တည်ရှိနေသည့် ငါးသယံဇာတဖြစ်တည်မှုကို လေ့လာသုတေသနပြုပေးသည့်အတွက် များစွာအကျိုးရှိပါကြောင်း၊ ထွက်ပေါ်လာမည့် သုတေသနသတင်းများအရ နိုင်ငံတော်၏ မြေသယံဇာတတို့နှင့် ချင့်ချိန်သုံးစွဲသွားရမည်ဖြစ်ကြောင်း ဒုတိယ၀န်ကြီးဦးခင်မောင်အေးကပြောသည်။

အစားအစာဖူလုံစေရေးအတွက် နောင်လာမည့်လူဦးရေ သန်း ၁၀၀ ကို မျှော်မှန်း၍ တွက်ချက်ဆောင်ရွက်ရန် Rv Dr. Fridtjof Nansen ရေယာဉ်နှင့်ပတ်သက်၍ ရလာသည့်ကိန်းဂဏန်းအချက်အလက်များကို အခြေခံ၍ ငါးတည်ရှိမှုထုထည်ပမာဏ၊ ရေရှည်ငါးဖမ်းဆီးထုတ်လုပ်နိုင်မှုများအား တွက်ချက်၍ ငါးဖမ်းဆီးထုတ်လုပ်နိုင်မှုတို့ကို အသေးစိတ်တွက်ချက် သတ်မှတ်ပေးနိုင်သည်။ ငါးဖမ်းရေယာဉ် တည်ရှိမှုစနစ်ကျင့်သုံးကာ အလုပ်ရုံဆွေးနွေးပွဲများ ကျင်းပပြုလုပ်ပြီး လူထုသဘောထားရယူ၍ ဆွေးနွေးဆောင်ရွက်သွားမည် ဖြစ်သည်။ ၂၀၁၄- ၁၅ ဘဏ္ဍာနှစ်မှစတင်ကာ နိုင်ငံခြားငါးဖမ်းသင်္ဘောများအား ငါးဖမ်းခွင့်မပြုတော့ကြောင်း တရားဝင်ကြေညာခဲ့ပြီးဖြစ်သည်။

ရေချိုငါးသယံဇာတ ပေါများစေရေးအတွက် ရေလုပ်သားများအနေဖြင့် သဘာဝပတ်ဝန်းကျင် ထိခိုက်မှုနည်းပါးစေရေးအတွက် ရန်ကုန်၊ ဧရာဝတီ၊ ပဲခူးဒေသများတွင် စိုက်ပျိုးရေးလုပ်ငန်းများတွဲ၍ ပေါင်းစည်းလယ်ယာစနစ်များ တည်ဆောက်သွားမည်ဖြစ်ကြောင်း ဖော်ပြထားသည်။ အစာအာဟာရဘေးကင်းလုံခြုံရေးအတွက် တစ်ဦးချင်း ငါးစားသောက်မှုတိုးတက်၍ နိုင်ငံတကာစံချိန်စံညွှန်းနှင့်အညီ တိုးတက်ထုတ်လုပ်နိုင်ရေးအတွက် လုပ်ငန်းဆောင်ရွက်ရေးအဖွဲ့ ဖွဲ့စည်း၍ ဆောင်ရွက်သွားခြင်းဖြင့် ငါးသယံဇာတပြုန်းတီးမှုလျော့ပါးပြီး ငါးသယံဇာတတိုးတက်လာအောင် ဆောင်ရွက်သွားမည်ဖြစ်ကြောင်း သတင်းရရှိသည်။

အဆိုပါ နော်ဝေးသုတေသန ငါးသယံဇာတလေ့လာတိုင်းတာရေး ရေယာဉ်သည် နိုဝင်ဘာ ၁၃ မှ ၃၀ ရက်အထိ ၁၈ ရက်ကြာ ပင်လယ်ပြင်တွင် သုတေသနပြုခဲ့ပြီး ဒီဇင်ဘာ ၂ ရက်တွင် နန်းသီတာဆိပ်ကမ်းသို့ ဆိုက်ကပ်ပြီး နောက်သုံးရက်တွင် ပင်လယ်ပြင်သို့ပြန်လည်ထွက်ခွာကာ ဆက်လက်သုတေသနပြုမည်ဖြစ်သည်။ ရေယာဉ်နှင့်အတူ ငါးလုပ်ငန်းဦးစီးဌာနမှ တာဝန်ရှိသူများ၊ မော်လမြိုင်နှင့် မြိတ်တက္ကသိုလ်မှ ကထိကများ၊ တပ်မတော်(ရေ)မှ တာဝန်ရှိသူများ စုစုပေါင်း ၁၂ ဦး လိုက်ပါသွားကြောင်း သတင်းရရှိသည်။ ယင်းသင်္ဘောသည် ၁၉၇၉-၈၀ ခုနှစ်တွင် မြန်မာ့ပင်လယ်ပြင်တွင် သုတေသနပြုခဲ့ပြီးနောက် နှစ်ပေါင်း ၃၀ အကြာတွင် ထပ်မံရောက်ရှိလာခြင်းဖြစ်သည်။

 

http://www.7daynewsjournal.com/article/12844


Post on : 17/12/2556 15:19